Ay Tahayyur-e-Ishq

اس زمانے کی کہانی جب ایک روپیے کا ڈھائی سیر آٹا آتا تھا اور دو آنے کی “چالو” چائے ملتی تھی۔نوجوان لڑکے ریسٹورنٹوں میں بیٹھے میز پر مکے مار مار کر سرخ انقلاب کی باتیں کیا کرتے تھے اور اگر زیادہ ہی عیاشی کا موڈ ہو تو چونی کی اسپیشل چائے کا آرڈر دیتے تھے۔

بلال کے ماموں جان نے پاکستان پہنچتے ہی ایسی کینچلی بدلی کہ دیکھنے والوں نے دانتوں میں انگلی دبالی۔ اچکن کی جگہ اجرک، علی گڑھ کٹ پاجامے کی جگہ بڑے گھیر کی شلوار اور  جناح کیپ کی جگہ سندھی ٹوپی نے لے لی۔

دوسری طرف بلال اپنی محبوبہ سے تنگ آچکا تھا۔ عجیب جھگڑالو لڑکی تھی۔ بات بات میں بحث کرتی تھی۔ وہ ماموں جان سے مشورہ کرنے گاؤں گیا مگر وہاں کوئی اور ہی ڈرامہ چل رہا تھا۔

یہ وہ دور تھا جب ٹی وی نہیں تھا اور رات کو کھانا کھانے کے بعد  گھر کے سارے افراد صحن میں چارپائیوں پر بیٹھ کر ریڈیو پاکستان سے گیتوں بھری کہانی اور فرمائشی پروگرام سنتے تھے۔ سیدھی سادھی زندگی تھی۔ جو کھانے کو مل گیا، شکر ادا کرکے کھالیا۔ جو پہننے کو مل گیا، خوش ہوکر پہن لیا۔ عید پر بچوں کو نئے جوتے ملتے تھے جنہیں وہ کئی کئی دن تکیے کے نیچے رکھ کر سوتے تھے۔ ذرا سی مٹی لگی دیکھی اور انگوٹھا چاٹ کر اس پر مل دیا۔ چھوٹی چھوٹی خوشیاں تھیں، چھوٹے چھوٹے مسائل تھے۔

اس کہانی میں سبھی کچھ ہے۔ آنسو بھی ہیں، قہقہے بھی ہیں، محبتیں بھی ہیں، نفرتیں بھی ہیں، مگر زیادہ تر لوگ اچھے ہی ہیں۔ ویسے بھی برے لوگ تو خال خال ہی ہوتے ہیں۔